Каран Жоҳарнинг янги фильми унинг навбатдаги ғалабаси ёки муваффақиятсизлиги,                                                              ўзингиз   баҳо берасиз.

"Менинг исмим Хон” - Болливуднинг энг машҳур жуфтлигини орадан 9 йил ўтиб яна бирлаштирган фильм. Шохрух Хон ва Кажол жуфтлиги иштирокидаги фильмларнинг қай бирини эслолмайсиз? "Ўғирланмаган келин”, "Гоҳо шодлик, гоҳо ғам”да улар яратган образлар миллионлаб томошабинларнинг юрак тубидан жой олган десак, муболаға бўлмас. "Менинг исмим Хон” Кажол ва Шохрух Хоннинг янги қирраларини очади. Ўта мураккаб характерга эга образлар, мураккаб саҳналар... энг муҳими, Болливудда ҳали бирон фильмга бу қадар катта маблағ сарфланмаган! Шохрух Хонни ўта романтик ошиқ тарзида кўришга ўрганиб қолганмиз. Бу фильм ишқий саргузашт ва севги қиссаларидан узоқ. Мавзулар қалашиб кетган: тиббиёт, ижтимоий ҳаёт, сиёсат, ғайритабиий муҳаббат, ғайриоддий саёҳат... Фильм тасвирларида ҳиндча ранг-барангликдан кўра, ҳақиқий, кўз кўриб ўрганган "бўёқ”лар бор. Раққосаларнинг бежирим либосу тақинчоқлари, бўлса-бўлмас куй ва қўшиқлар... шу каби ҳиндча бир хилликка чалғимайсиз. Фильм моҳияти сизни ўлантириб қўяди. Хуллас, феврал ойида дунё бўйлаб намойишни бошлаган "Менинг исмим Хон” она тилимизда август ойида "Синема Маркет” компаниси томонидан ўзбек киномухлислари эътиборига ҳавола этилади. "Рўзаи Рамазон ойида ҳинд киносини севувчи ватандошларимиз учун бу фильм ажойиб туҳфа бўлади” дейди, компания раҳбари Аҳмаджон Умаров.

Каран Жоҳар, Шохрух Хон, Кажолнинг ашаддий мухлислари билан бирга августни интиқлик билан кутамиз!

Дарвоқе, Каран Жоҳарнинг янги фильми унинг навбатдаги ғалабаси ё муваффақиятсизлиги, бунга ўзингиз баҳо берасиз!

shov-shuv.uz