So‘nggi yillarda global muammoga aylanib borayotgan "Odam
savdosi” qurbonlarining soni yildan-yilga oshishi juda achinarli holat. Kimdir bilib,
yana kimdir esa bilmasdan tuzoqqa ilinmoqda. Asosan sodda, samimiy, ishonuvchan
yurtdoshlarimizni katta miqdordagi oylik maosh va’da berib, o‘zga yurtga o‘zimiznikilar
jo‘natayotganligi juda ayanchli. Bugun biz bir mushtipar, bir oilani gullatadigan go‘zal va latofatli ayolni
dardlariga sherik bo‘ldik...
O‘zining ismini
Nilufar deya tanishtirgan samarqandlik kelinchak bundan 3 yil oldin orzu
havaslar bilan o‘zi yoqtirgan yigitga turmushga chiqqanligini to‘lqinlanib gapirishdan
boshladi.
— Feruz
aka... To‘g‘risini aytsam, bu insonni aka deyishga ham tilim bormayapti. Biz yaxshi
niyatlar bilan oila qurgandik, lekin turmushning mushtlari qattiq bo‘larkan. 20
yoshimda shu insonga turmushga chiqqanimda, go‘yo, hayotim jannatga o‘xshardi. O‘zimni
yettinchi osmonda his qilardim. Bu xursandchiligim uzoqqa cho‘zilmadi. Ko‘ngil
qo‘ygan insonim ichib kelib, sababsiz meni do‘pposlashni o‘ziga odat qilib oldi.
Bugun yaxshi bo‘lar, ertaga yaxshi bo‘lar, degan ishonch bilan bir yil yashadim.
Yo‘q, natija bo‘lmadi. Bu orada o‘g‘illi bo‘ldim. Farzandli bo‘lganimizdan
so‘ng bu ko‘ngilsizliklar nuqta qo‘yar, derdim. Adashgan ekanman. Oxir-oqibat,
"bo‘ldi, hammasiga nuqta qo‘yaman”, deganimda qaynonam shart qo‘ydi:
— Seni kelin
qilgunimmizcha ketgan xarajatlarni, shu kungacha yeb-ichgan haqqingni to‘lasanggina
ketasan!
Qaynopam
esa menga yordam beradigandek dedi:
—
Xohlasang, seni chet elga ishga jo‘nataman. Kelishilgan summani bizga jo‘natasan,
qolgan xizmat haqqingni o‘zing uchun olaverasan!
Shu suhbatimizni
turmush o‘rtog‘im ham eshitib, meni chet elga ishlash uchun borishga majburladi.
Ularning aytishicha, u yerda chol-kampirning xizmatini qilsam, oyiga ming
dollar maosh to‘lasharkan.
— Chet elga
ketishingni o‘zim ta’minlayman. To‘y, shu paytgacha yeb-ichganing va yo‘l kirang
bilan bizga 15 ming dollar to‘laysan! — qaynopamning xulosasi shu bo‘ldi.
Erimning
kaltaklaridan shu qadar bezgan ekanmanki, bu taklif menga zulmatli hayotimdan yorug‘likka
chiqish yo‘li bo‘lib ko‘rindi. O‘g‘limni
ota-onamga berib, orzular og‘ushida chet elga ishlashga ketdim. Qaynopamni tashabbuslari
bilan olti kishi bo‘lib, samolyotda Dubay tomon uchdik. Ne ko‘z bilan ko‘rayki,
na qari cholu kampir bor va na boshqasi. Fuqarolik pasportlarimizni yig‘ib olib
qo‘yishdi. Chet tilini bilmaganim uchun ularning imo-ishoralari va olaqarashlaridan
boshqa niyatda jo‘natganliklarini his qildim. Ularning taklifiga norozi ekanligimni
tarjimonlar orqali bildirdim. Eng dahshatlisi, ana o‘shanda boshlandi. Qolgan beshta
qizni boshqa qaytib uchratmadim. Meni aeroportda qabul qilib olgan ayol bilan
yana to‘rtta barzangidey erkak, ko‘rinishi rus millatiga o‘xshash qiz ikkimizni
kimsasiz cho‘lga olib ketishdi. Bu dahshatli voqeani so‘z bilan ifodalay olmayman.
Eslasam, butun a’zoyi badanim titrab ketadi. Kimsasiz cho‘lda bechora qizni to‘rtta
barzangi erkak... zo‘rladi. Takliflariga ko‘nmasam, men ham shu ahvolga tushishimni
tushuntirishdi. Nima qilishni bilmay boshim qotdi. Na chora, yashash uchun rozi
bo‘ldim. Orqaga qaytayapmiz-u, haligi bechora qizni kimsasiz cho‘lda behol, kiyimsiz
bir ahvolda tashlab ketishayotganini ko‘rib, ularning hayvondan ham battar
angladim. Qizning taqdiri menga qorong‘i. Cho‘lda o‘lib ketdimi yoki kimdir
ko‘rib uyiga olib ketdimi?.. Keyin bilsam, u qiz mijozlarga yaxshi xizmat
ko‘rsatmagan ekan. Buni menga dars sifatida ko‘rsatishibdi. Ularning taklifiga
rozi bo‘ldim-u, lekin oldinda yana bir qancha shartlari ham borligini keyin tushunib
yetdim. Mijozni ko‘nglini olish har bitta ayolning vazifasi ekanligi qat’iy tushuntirildi.
Atrofimdagi qizlar menga ingliz tili va arabcha raqs tushishlarni o‘rgata boshlashdi.
Bu botqoqlikda hattoki, husnim ham menga pand berdi. Aniqroq qilib aytganda, boshimga
balo bo‘ldi. Hayotimda birinchi marta go‘zal bo‘lib tug‘ilganim uchun afsuslandim.
Sababi, boshqa qizlarga qaraganda mening mijozim ko‘pligidan bir kun ham dam olish
kuni bo‘lmasdi. Ichimdan o‘tayotgan dardlarimni atrofimdagi qizlarga aytishga
ham qo‘rqardim. Ko‘zimga hamma dushman bo‘lib ko‘rinardi. Hammadan nafratlanardim.
Lekin buni o‘zlariga sezdirmasdim. Chunki oqibati yaxshilik bilan tugamasligini
bilardim. Bu muhitga ko‘nikkanimga ularni ishontirganimdan so‘ng qizlar bilan diskotekalarga
borishimga ruxsat berishdi. Bildirib qo‘ymaslik uchun bir-ikki marta borib kelib
yurdim. Uchinchi marotaba chiqishimda o‘z xohishim bilan o‘zimni militsiya xodimlariga
topshirdim. Ular meni zindonga qamashdi. Kimligim va qaerdan kelganligim haqida
batafsil ma’lumot berganimdan so‘ng bizning elchixonamiz bilan bog‘lanishdi. Shaxsimni
aniqlashga bir hafta, hujjat tayyorlash va yurtimga qaytishni ta’minlash uchun
esa ikki oy vaqt ketdi. Birlashgan Arab Amirligi menga shaxsimni tasdiqlovchi
hujjat tayyorlab bergan bo‘lsa, hukumatimiz Vatanimga qaytishim uchun yo‘l
xarajatlarini to‘lab, chiptamni qo‘limga olib kelib berishganida ko‘zimga achchiq
yosh keldi (o‘ksib yig‘ladi)... Yurtimga qaytishim bilan hamma qiyinchiliklar
orqada qolganligini butun borlig‘im bilan his qildim-u, lekin aeroportda kuchli
vahima bosdi. Go‘yoki yana kimdir meni olib qochib ketib, o‘sha botqoqqa oborib
tashlayotgandek edi. Samolyot osmonga parvoz qilmagunicha sarosimada o‘tirdim.
Samolyotda "Hurmatli passajirlar kamarlaringizni taqib oling, qo‘nishga tayyorlanayapmiz”,
degan so‘zni eshitganimda oynadan pastga qaradim-u, ko‘zimdan yosh oqdi. Hozir
o‘sha holatimni sizga tasvirlab bera olmayman... (Ko‘ziga yosh keldi). Shu
darajada hayajon bosdiki, o‘zimni o‘zim idrok eta olmay qoldim. Atrofimdagilar meni
ko‘rib hayronu lol, men esa o‘zimni yig‘lashdan to‘xtata olmasdim.Hattoki, samolyotdan
o‘zim tushishga holim yo‘qligidan hushimdan ketib qolay dedim. Aeroport xodimlari
yordamida birinchi tibbiy xizmat ko‘rsatilganidan so‘ng ancha o‘zimga keldim. Aeroportni
o‘zida meni Ichki Ishlar xodimlari kutib olib, shifoxonaga joylashtirishdi. Bir
oy davomida shifoxonada davolanish bilan birga, qaynona, qaynopa va erimning kirdikorlarini
oshkor qildim. Ular tegishli jazosini olishdi. Hozir ahvolim ancha yaxshi. Lekin
meni bitta narsa qiynaydi. Ko‘cha-ko‘yda yursam hamma meni qo‘li bilan ko‘rsatib,
"dubayskiy” deb gapirishadi. Bu so‘zni ko‘tarish menga qanday og‘irligini his qilayapsizmi?..
Ikki yoshli
o‘g‘limning kelajagini, taqdiri qanday bo‘lishini o‘ylasam yuragim orqaga tortib
ketadi. Bu tamg‘a nafaqat o‘zimga, farzandimning ham peshonasiga urilib qolmadimi?..
Ertaga "otam kim?” desa nima deyman? (Yig‘laydi). Otang meni chet elga sotib yuborgan,
deb aytish uchun o‘zimda jur’at topa olamanmi?.. Bilmayman (o‘zini yig‘idan to‘xtata
olmadi). Sizlar bilan gaplashishga rozi bo‘lganimning yagona sababi boshqa ayollarimiz,
qizlarimiz aldanib qolmasliklarini, mening hayotim ular uchun bir dars bo‘lishini
xohladim. Hamma joyda toshu tarozi bir xil. Chet elda yaxshi daromad topaman, deb xom xayol bo‘lmang!
Hech qaerda osonlikcha bir so‘m pul berilmaydi, sizga katta pul evaziga ish taklif
qilishayaptimi, bilingki, o‘sha joyda yolg‘on bor.
Muallif: 23
yoshli Nilufarning dardlarini eshitib, inson zoti shu darajada tubanlikka borishi
mumkinligidan hayratga tushdim. Biz inson farzandlarimiz-ku, oriyatli erkaklarimiz
qaerga qarashayapti? Xotinini bozorga chiqarib, uyida kerilib yotgan erkaklar
haqida eshitganmiz. Lekin pul uchun o‘z jufti halolini qul qilib sotgan erkakni
hali tarix ham ko‘rmagan bo‘lsa kerak. O‘z kelinini arzimagan pul evaziga sotib
yuborayotgan onaning ko‘ziga nevarasi ko‘rinmadimikan? Nahot insoniyat shu
darajada tubanlikka qarab yo‘l olayotgan bo‘lsa?! Siz hali bu kabi jabrdiydalarning
bittasi bilan tanishdingiz, xolos. Ro‘yxatda hali qancha-qanchasi turibdi. Ba’zilari
aldangan bo‘lsa, ming afsuski, bu yo‘lga o‘z xohishi bilan ketganlari ham yo‘q
emas.
O‘zbekiston
Respublikasi Ichki Ishlar Vazirligi
Transportdagi
ichki ishlar boshqarmasi
jinoyat qidiruvi
va terrorizmga qarshi
kurashish boshqarmasi
"Odam savdosiga єarshi
kurashish”
bo‘limi bilan
hamkorlikda tayyorlandi.
Muallif: Dilbahor
XUDOYBERDIEVA
"QATTIQ
SAROSIMADAMAN...”
Kuzatuvlar jarayonida
aeraportga kelib tushgan Umida ismli qiz bilan ham gaplashishga muvaffaq bo‘ldik.
— Yolg‘iz
o‘zim Moskvaga bordim. U yerdan Sochiga samolyotda uchdim. Qora dengiz orqali
Turkiya davlatining Istanbul
shahriga o‘tdim. Niyatim davlatlarni ko‘rib sayohat qilish edi.
— Fuqarolik
va xorijga chiqish-kelish boshqarmasining maxsus ruxsatnomasisiz qanday chiqdingiz?
— Bilmadim.
Bu haqda menga hech kim hech narsa degani yo‘q.
— Nega
hayajonlanyapsiz?
— O‘zim. Qattiq
sarosimadaman. Noqonuniy chiqqanligimni bilmagandim.
"NEGA
AFSUSLANAY?”
Shahnoza 23
yosh, buxorolik, Dubaydan olib kelingan.
— Qaerga ketayotganimni
va nima ish qilishimni oldindan bilganman. Bu haqda onamning ham xabari bor edi.
Ikki yil davomida Dubayda ishladim. Huquq-tartibot idoralari xodimlarining qo‘liga
tushib qolganimdan so‘ng O‘zbekistonga qaytarishdi.
— Otangiz bormi?
— Yo‘q. Ota-onam
ajrashib ketishgan. Mendan javob olaman, deb umidvor bo‘lmang. Men sizga hech
narsa aytolmayman. Qiziqishingiz kuchli bo‘lsa, chipta olib Dubayga borib keling.
— Qilgan ishingizdan
afsuslanish hissi bormi, sizda o‘zi?
— Yo‘q,
nega afsuslanaman. Peshonamda borini ko‘raman. Oh-voh qilganim bilan hech narsa
o‘zgarmaydi. Yoki siz menga ishimni osonlashtirib bermaysiz-ku...
O‘zini tutishi,
gap so‘zlaridan bu qizning chehrasida zarracha ham afsus-nadomat ko‘rinmaydi. Eng
achinarlisi, oriyatli, nomusli o‘zbek qizidan zarracha ham namuna yo‘q. Bu qizlarni
vatandoshim, yurtdoshim, deyishga ham uyalasan kishi. Qizini qaerga, qanday ishga
jo‘natayotgan ona haqida nima deyish mumkin? Esiz...
|