Гулчехра Адизга тарсаки туширди - 25 Марта 2010

Адиз ва Гулчехра, улар хали хеч бир фильм ва лойихаларда бирга иштирок қилишмаган null

"Журналист-юлдуз” лойихамизнинг бу иштирокчилари "почин” сифатида илк маротаба бир лойихада бош рольда иштирок қилишади.

Бир кун аввал M&TVA-2009 йилнинг энг яхши актрисаси мукофоти сохибаси Гулчехранинг тавсиясига биноан "Такси-блюз” кафесида соат 15-00да учрашадиган бўлдик.

Адиз хар галгидек «пунктуальный» бўлиб, хаммамиздан олдин тайёр бўлиб кутиб турган экан. Қўлидаги дафтар ва ручкадан ўқишдан келяпсизми десам: Йўқ, саволлар тузганман, соат 2-гача ухламай тайёрладим-дейди.

Айнан Адиз жиддий ёндошишига шубхаланмаган хам эдим.

Кафега кирсак…эшиклар ёпиқ.. улар кечаси ишлар экан. Нима қилиш мумкин?

Шундоққина ёнидаги эшикдан кириб, кафе тўғрисида суриштирдигу, "Siesta” мебеллар салонига тушиб қолганимизни кўриб фикр келди.

Улар йўқ демади, биз эса кетмадик!))

Хуллас "Siesta” мебеллар салони маъмурияти лутфан мазкур лойихамизнинг ижара бўйича бош хомийси бўлиб, стол-стул, дивандан тортиб, тўшакларгача ихтиёримизда эканлигини маълум қилишди.

Тўшаккача боришга албатта лойихамизнинг хеч бир банди тўғри келмасди, шунинг учун лойиха бахона дивандан бошлаб, стол-стул ва хатто ошхона мебелларигача фойдаланиб чиқдик. ;)

Биринчи бўлиб ва тайёрланиб келган Адиз интервьюни бошлайди.

Адиз: Театр масаласидан бошласам. Мени кейинчалик театрда ишлаш ниятим бор, Сиз-чи, давом эттирмоқчимисиз, ё бўлдими?

Гулчехра:-Яқинда театрга бордим, репетицияларида қатнашдиму, нимагадир кириша олмадим.

Адиз: Мухитими, нимасига?

Гулчехра:-Билмиман, анча бўлганигами театрга бормаганим, сахнага 4 йил чиқмадим. Шу репетицияда хеч хам кириша олмадим, эмоцияга берила олмадим.

Адиз: Демак, театр мухитидан чиқиб кетгансиз, менга қийинроқ бўлар экан, Сиз барибир театрда ишлагансиз аввал.

Гулчехра:-Йўқ мен ўзимни аяйдиган бўлибман Адиз. Фильмларда дод-вой, ўлдим-қолдим бўлиб қийналавериб, ўзимни аяйдиган бўлибман. Энди билмайман қайтаманми театрга йўқми. Сиз театрда ишламоқчимисиз? Қариганингиздами? Қариганда театр яхши-да.

Адиз: (кулади) жудаям қариганда эмас-ку, айтяпсиз-ку чиқиб кетганман деб, барибир ёшликдан бошлаш керак. Хуллас, кейинги савол, қоматингизга қараб савол туғиляпти, пархез тутасизми ёки хозирги замонавий аёлларга ўхшаб, фитнес, шейпинг?

Гулчехра:-Менинг пархезим кино (кулади). Кинода севавериб, севилавериб, ташлаб кетишавериб, ўлиб тирилавериб пархезимга айланди. Кўп сиқиламан, депрессия холатида бўламан, ўйловларим жуда кўп.

Адиз: Суратга олиш ишларидан чарчаган пайтларингиз қай тарзда хордиқ чиқаришни ёқтирасиз.

Гулчехра:-Театрда хам фильмда хам стрессларимни чиқариб олардим. Яъни сиқилган ва хеч кимга айта олмаган нарсаларимни чиқариб олардим. Шу икки минг одам қараб турса мазза қилиб ўйнаб, шу энергиянгизни берасиз-да. Суратга олиш ишлари бўлмаса чарчайман, ва шу суратга олиш жараёнининг ўзида дам оламан.

Адиз: Мисол учун олдингизга мухлисангиз келиб, шунчаки хохиш юзасидан, мен актриса бўлмоқчиман деб маслахат сўраса жавобингиз?

Гулчехра:-Актриса бўлмагин дердим.

Адиз: Нимага?

Гулчехра:-Чунки, бу осонмас, жудаям қийин. Қиз болага жуда қийин, актриса бўлса қанча қийинчиликлардан ўтиши керак бўлади, 20дан ошганида турмушга чиқиши керак, совчилар танлаши қийин бўлади, актриса экан дейди, гап-сўз, шунинг учун, мактабни битиргину турмушга чиқ дейман. Мен хаммага шундай дейман. Гап у эртага зўр бўлиб, мендан ўтиб кетишидан қўрққанимда эмас, биздан аввал хам зўрлари бўлган, биздан кейин хам бўлади. Қиз болага актрисалик нонини ейиш қийин. Чидаганга чиқарган бу касбни.

Адиз: Саволим негизида сал бошқачароқ нарса бор эди, чунки хозирги ёшлар, актерлик сохасини, умуман санъат олами вакили бўлиш жуда хам осон деб ўйлашмоқда. Шунчаки бир машхурликка интилиш, у-бу ким мени кўрсин, қариндошлар ва хоказо.

Гулчехра:-Тўғри бу нарсани озгина вақти бўлади, хаммаси яхши бўлади аввал, машхурлик хам, фильмлардаги иштироклар лекин оилага келган пайт қийинчиликни сеза бошлайди. Айнан қиз болага асосан бу жуда қийин.

Адиз: Кейинчалик режиссурага қўл урмоқчимисиз?

Гулчехра:-(ўйланиб) Мана шу актрисани хаётини халққа шундай кўрсатиб бермоқчиман-ки, улар бу касб осон эмаслигини, актриса хам инсон эканлигини, бошқа касб сохиби шифокор, ўқитувчилар каби ойликка ишлаши, пул топай дейиши шуларни кўрсатиб бериш орзуим. Одамлар тасввурида бошқачамиз, гўёки кўчада эркаклар билан юрадиган, тўғриси-да, қўпол бўлса хам бор нарсани айтяпман, вахоланки бизнинг ишимиз шунчаки одамлар кўзига кўп кўриниш холос. Бу бизнинг айбимиз хамдир.

Адиз: Бу айбмас-да

Гулчехра:-Одамларнинг кўзида айбдор бўлиб қолаётгандекман.

Адиз: Хозир севишганларни ролини бемалол талқин қила оляпсиз. Нима деб ўйлайсиз 15-20 йиллардан сўнг хам шундай севиб қолган аёлларни ролини ижро қила оласизми? Ғарбда ёши ўтган аёлларни фильмларда севишганлар ролига олиб чиқаверишади. Бизда эса 30дан ошган актрисаларга дарров ё она..

Гулчехра:-Бизларнинг режиссерларимиз шундай, дарров она ролига "тиқиб” қўйишади. Вахоланки саволингизга, бундан хам кучли ижро қила олган бўлардим деб жавоб бераман. Чунки аёл кишига 30-40 ёшида кучли севги келади деб ўйлайман. Ана шунда у бошқачароқ ижро қилади бу рольни.(кулишади)

Адиз: Дунё киноматография актрисаларидан кимни мукаммал деб биласиз ва кумирингиз ким?

Гулчехра:-Кумирим бор дея олмайману, лекин кучли актрисалар жуда кўп дейиш мумкин. Яқинда бир хинд фильмини томоша қилдим, Шридеви ижросидаги. Кап-катта хотин 5-6 ёшлик қизчани ролини ижро қилган. Масалан мен ижро қила олган бўлмасдим. Шу катта ёшдаги инсонга ёш болани қилиқлари бачкана бўлиб туюлмади, аксинча мен ёш қизчани кўрдим, шунақанги зўр ижро қилган. Шу аёлни айта оламан.

Адиз: Санъат йўлини танлашда ким ёки нима туртки бўлган?

Гулчехра:-Хеч нарса туртки бўлмаган, Худо томониданми, шунчаки қилиш керак деган нарса бўлган. Санъаткор бўламан деб ўйламаганман, умуман орзу хам ният хам қилмаганман, ўзидан-ўзи бўлиб кетган. Актриса бўлиш ниятим бўлмаган, журналист бўламан деб келгандим.

Адиз: Менда хам худди шундай бўлган

Sayyod: Хамма ўзи журналист бўламан деган шекил

Гулчехра:-Актрисаликка топшириб кириб кетганман.

Адиз: Ўзбек киносидаги қайси актер ёки актриса билан ижод қилгингиз келади?

Гулчехра:-Сиз билан. Ижод қилмаганмиз-ку. Фаррух билан ижод қилдим, Улуғбек билан неччи йилдан бери, Алишер билан хам ижод қилдим. Ким бор? Адиз! Адиз Ражабов деган актерни биласизми? Бизни Адиз билан чет-эл кутмоқда деб ўйлайман (кулишади).

Навбат Гулчехра Эшонқуловага

Гулчехра: (менга қарата) Менимча кўпроқ хаётий саволлар берсам керак, санъатдан йироқроқ. Эркак киши хаётига боғлиқ бўлган, эркак киши-ку у хам

Адиз: Ха, шунақа бўлса керак. (кулишади). Қани бемалол, нималар қизиқтиряпти эркаклар хақида?

Мен кулиб юборганлигим боис Гулчехра Адизни оёғига тарсаки туширади: Мани хеч нарса қизиқтирмаяпти эркаклар хақида!

Адиз: Ман тўғри…вааай, (менга қарата) булар-ку бошлаяптилар қиқирлаб.

Гулчехра: Сиз расмчи жиим ўтиринг

Адиз (маза қилиб кулади) : Расмчи!))

Гулчехра журналист образига кириб саволларга ўтади: Хаётингиз мазмуни нимада деб биласиз?

Адиз: -Бу жудаям чуқур мавзу.

Гулчехра: Ўйлаб жавоб бераверинг, менга қисқа жавоб керак эмас.

Адиз: -Хўш, хаётимни мазмуни, ота-онамни соғ-саломат кўришимда. Яхши келин топиб оилалик бўлиш, яхши фарзандлар кўриш, хаётим мазмуни ўз касбимда хамиша менга бўлган талаб бўлишида, керакли бўлишимда. Хаётим мазмуни бу дунёдан умуман армонсиз ўтишда.

Гулчехра: Барибир армон бўлади-ку

Адиз: -Тўғри бўлади..

Гулчехра: Хозир Адиз Ражабовни армони нима? Ёшликдаги эмас, хозирги шу 2010 йилдаги армони

Адиз: -Армоним йўқ хозир Худога шукур. Менимча армон ёш ўтганда, бошдан анча-мунча нарса ўтганида бўлиши мумкин.

Гулчехра: Оддий инсон сифатида актрисани севиб қолган бўлармидингиз?

Адиз: -Севиб қолган бўлардим.

Гулчехра: Унга оддий инсон сифатида қараган бўлармидингиз? Яхшилаб ўйлаб жавоб беринг фақат.

Адиз: -(кулади) Севиб қолган бўлардим. Агар оддий инсон бўлганимда.

Гулчехра: Бошқа болалар қўл телефонларида суратларини кўрасиз..

Адиз: -Бу иккинчи масала, фикримнинг давоми: Барибир оддий инсон учун экрандан у қандайдир бир идеал сифатида кўринади. Лекин, тўғри айтдингиз, бошқа болалар қўл телефонларида суратини кўришим бор…

Гулчехра: Тасаввур қиласиз, кафеларга бирга бора олмайсиз, ўртоқларингизга кўрсата олмайсиз

Адиз: -Оғриқли мавзу (кулади). Жуда қийин нарса, у қиз билан яшаш қийин кечса керак.

Гулчехра: Нималар халақит берган бўларди?

Адиз: -Агар одам бошқаларни фикри билан хисоблашмайдиган бўлса, унга осонроқ кечар. Лекин инсон бошқалар фикрига қарам бўлса бошқа гап, шунинг учун одамнинг ўзига боғлиқ.

Гулчехра: Бизда ўзбекчилик деган нарса бор, ва касбкор танлаган қизга уйланмагин деган гап бор. Исломда касбкор аёл гўнг қўнғиз дейилган адашмасам. Бир тарафдан севиб қолса кўзи кўр бўлади хам дейишади

Адиз: -Мана шу тарафига чидай олмайман. Жуда хам рашким кучли, шунинг учун менимча…йўқ. Лекин актриса бўлгани учунмас.

Гулчехра: Инсон сифатида яхши аёл бўлса-чи?

Адиз: -Инсон сифатида хам яхши бўлиши мумкин, хозир биз шунчаки юзаки қараяпмиз-да. Агар севиб қолсам, бошқалар фикри менга барибир бўларди, тўғриси.

Гулчехра: Бир қиз билан учрашиб севишиб юрдингиз дейлик, шундай бўладими ўз фикрингиздан қайтишингиз? Бошидаги ёқтириш йўқолса у қизга айтган бўлармидингиз?

Адиз: -Айтардим.

Гулчехра: Қандай эркаклар айтмаган бўларди деб ўйлайсиз?

Адиз: -Энди билмадим бизда яна қандай эркаклар бор

Гулчехра: Тасаввур қилинг, бизда тасаввур кучлироқ-ку ахир.

Адиз: -Масалан хеч қайси бир одам чидаб юра олмаса керак, уни хам ўзини хам алдаб юриб, ўзини хам уни хам бахтсиз қилишга. Бу аёл ёки эркак эмас хаммага тегишли.

Гулчехра: Эркак кишини бир сўзи бор экан "Калта ўйлаган эканман” дегани. Шу нима дегани?

(кулишади)

Адиз: -Биласизми, 15 йиллардан кейин учрашганимизда хаммасини ёритиб берарман, Худо хохласа. Эркак киши бундай дедими, демак ўша пайт шундай бўлган. У хар бир одамнинг ўзига боғлиқ.

Гулчехра: Роль ўйнаганингизда ўша актрисани росмана севиб ижро қиласизми, ёки шу сценарийда кўрсатилгандекми? Озгина эпизод бўлса хам ўша пайтда сева оласизми? Яшай оласизми шу онда ўша рольда?

Адиз: -Ха. Ман техник эмасман. Масалан борку "технарь”лар. Ундай эмасман. Ўзимдан ўтказиб роль ижро қиламан.

Гулчехра: Қайси партнерингиз билан мазза қилиб, берилиб роль ижро қилгансиз? Ва у қайси роль эди?

Адиз: -Мисол "Пойма-пой”да. Бу фильмни сценарийси хам яхши бўлган-да.

Гулчехра: У қиз ёш энди чиқиб келаётган актриса бўлса, қандай қилиб у билан мазза қилиб роль ижро қилишингиз мумкин?

Адиз: -Биринчидан ўзимни ичимдаги кечинмаларимни айтаяпман.

Гулчехра: Ундан Сизга бўлган жавоби қандай бўлган?

Адиз: -Институтда биринчи курсда ўқийдими, биринчи фильмига нисбатан яхши.

Гулчехра: Менимча унда актрисалик ниқоби хали йўқ. У ростдан хам йиғлаган, ростдан хам яхши кўриб қолган, шунинг учун хам унга балки осонроқ бўлгандир. Чунки ўзим илк ролим Офелия қахрамонини ўқиганимда, мен шунчаки ўқимаганман, профессионал актриса сунъийроқ ижро қилади. Илк беғуборлик бошқачароқ.

Адиз: -Ха, тоза бўлади, рольни тезда ўзига сингдириб олади.

Sayyod:Лекин профессионал актерларнинг роллари жуда хам ишончли чиқади

Адиз: -Бу аниқ бир факт эмас, шунчаки бундай холатлар хам мавжуд деган мисолда келтирмоқдамиз. Илк рольда роль сифатида эмас, одам кўпроқ хаққонийликни ўзида сезади демоқчиман.

Гулчехра: У қизда барибир маъсулият катта бўлган, буни сезиб ижро қилган, катта экранга чиқадиган илк фильми олдида унда уйнинг фундаменти сифатида фикр бўлади, чунки уйнинг фундаментига қараб уйнинг келажакда қандай туриши аниқланади.

Sayyod: Дилноза Кубаеванинг сўнгги "Хижрон” фильмидаги роли росмана ажаблантирди, хаққонийлик шу қадар етказилган-ки томошабин бир зум фильм эканлигини унутиб қўяди

Гулчехра: Чунки анча вақт роль ижро қилмай ўзида энергиялари йиғилиб қолган эди, кейин фарзандли бўлди, фарзанд нима эканлигини хис қилди, биз бундай рольни харакат қилсак, у эса хис қилиб бу мухитда яшаганлиги боис кўрсатиш осонроқ кечади. Шунинг учун унда сўзсиз хаққонийроқ чиқади.

Лойихага қайтамиз.

Гулчехра: Гороскоп деган мунажжимлар башорати бор, унга ишонасизми? Бир маротаба бўлса хам у китобни очиб ўқиганмисиз? Хаётингизда учраган инсонлар у китобда кўрсатилганидек Сизга мос тушмагани бўлганми?

Адиз: -Ўқиганман, мос тушишлик холатлари бўлган. Ва мен шунисига ишонаман. Лекин, юз фоиз эмас.

Маълумот: Гороскоп бўйича Адиз "Козерог”, Гулчехра "Близнецы”.

Гулчехра: Демак туғулган кунингиз декабрь?

Адиз: -Январь.

Гулчехра:Нимага туғулган кунингизга таклиф қилмадингиз?

Адиз: -24 январь куни туғулган кунимда ўзим суратга олиш жараёнида банд эдим (кулади).

Гулчехра: Мен хам туғулган кунимда доим бошқа жойларда нималар биландир банд бўламан. Кейинги савол: Суйганингиз албатта, эркак киши тушунчаси бўйича уй бекаси, оғир-босиқ, содда, ўзига қарамайдиган бўлиши керакдир. Лекин Сизга уни кўпроқ қай жихатлари мухим бўлиши керак? Яъни бошқа қизларда учратмаган нималарни кўришни истардингиз?

Адиз: -Суйганим мени шунчаки Адиз сифатида кўришини истардим. Умуман актер сифатида эмас, у учун шунчаки Адиз бўлишни хохлардим.

Гулчехра: Лекин бундай бўлмайди-да

Адиз: -Шуни айтяпман-да (кулади)

Sayyod: Машхурликкача суйгани бўлса осонроқ

Адиз:-Тўғри бу осонроқ. Машхурликкача бўлган дўстлар хам бошқача.

Sayyod: Машхурликдан сўнг эса, муносабатлардаги хамма нарсага хадик билан қарай бошлайсиз, балки машхурлигимга?- деб.

Адиз: Тўппа-тўғри! Яшанг!

Гулчехра: Бу хақиқат. Кўпчиликка машхурлар билан муносабат "понт” учун керак. Кейинги саволим: Неччи ёшда уйланмоқчисиз?

Адиз: -Хозир 26 ёшман, 27 ёшимда уйланмоқчиман.

Sayyod: Хар йили кейинги йил-а?

Адиз:-Ха шу-де ока, Худо хохласа (кулади)

Гулчехра: Туркияда эркак киши 30 ёшдан кейин уйланар экан, сабаби юриб, тўйиб, хамма нарсасини тўлиқ қилиб оёққа туриб, кўзи тўйиб, бўлди уйланаман деган қарорга келар экан. Сиз шу 26 ёшингизда тайёрман дея оласизми оила қуришга?

Адиз: -Нима десам экан? Хали қиладиган ишлар кўп. Кўча тарафлама эмас (кулади). Умумий оилавий тарафлама. Шарт-шароит деганларидек. Кейин уйга келганда, бўлди, хотин бўлса деган фикр келар экан.

Гулчехра: Севиб севилмасангиз, севги жавобини ололмасангиз қандай йўл тутган бўлар эдингиз?

Адиз: -Албатта бу фожеа! Эришишга харакат қилаверган бўлардим .

Гулчехра: Жавоб йўқ бўлаверса?

Адиз: -Демак бўлди.

Гулчехра: Стрессни қандай енгган бўлар эдингиз? Ўзингизни нимага урган бўлардингиз, айтайлик суратга олиш ишлари йўқ, нимадир қилиш керак, стрессни енгиш учун нима қилган бўлардингиз?

Адиз: -Айтишади-ку аламидан ичади деб, балким….билмадим. Ўзим учун янги сохани кашф қилиб қизиқадиган бўлсам керак. Одам иш билан банд бўлган пайт дардларидан йироқлашади. Янги соха, спортми, умуман ўзим учун хаётимда янгилик кашф қилардим чалғиш учун.

Гулчехра: Биз бирга роль ижро қилишимиз учун қандай фильм ёки роль бўлиши керак? Иккимизни қандай фильмда тасаввур қиласиз?

Адиз: -Тарихий фильмда. (Гулчехра хандон отиб кулади) Клеопатра масалан, роса ўхшаган бўлар эдингиз.

Гулчехра: Клеопатра хаммани қонини ичган

Адиз: -Мен нима хақида айтяпман (кулади)

Гулчехра: Нима демоқчисиз бу гапингиз билан? (кулади)

Адиз: -Тўғриси-да, Сизни қанчадан-қанча эркаклар экрандан кўриб севиб қолади.

Гулчехра: Менга ундай севги керак эмас-да. Кейинги савол, қиз болада ёмон кўрган нарсангиз?

Адиз: -Кўпчилик эркаклар айтса керак: Енгилтаклик! Қиз болани ликиллаб юриши миямга уради. Кейин камроқ савол бериши керак.

Гулчехра: Дейлик ишдан чарчаб келдингиз, овқатингизни бериб кириб ухлайдиган, ёки келишингиздан аввал қўнғироқ қилиб қаерда эканлигингиз, ким билан, нима қиляпсиз сўраб тергайдиган, хушчақчақ ёки маслахат берадиган аёл бўлиши керак?

Адиз: -Гулчехра, қиз болада хамма нарса меъёрида бўлса, ўша тергаши-ю, савол бериши хаммаси меъёрида бўлса яхши бўлади.

Гулчехра: Демак Сизга жудаям ақлли аёл бўлиши керак. Ақлли аёл меъёрни билади. Ёш қизда у нарсани топа олмайсизда.

Адиз: -Нимага? Балки бўлади.

Гулчехра: Балким, хозир ёшларимиз жуда ақлли. Кейинги савол, нимага Сиз бошқа актер болаларга ўхшамайсиз, мана шу савол мени қийнайди?

Адиз: -Нимага ўхшашим керак? Қайси тарафлама масалан?

Гулчехра: Ижод эмас, умуман? Бошқачасиз, камтарин, камгап, ўзингизни олиб қочиб юрасиз.

Адиз: -Кам гапиришим балки ўзимни "самоконтроль” қилишимдандир. "Страховка”, "козерог”лар "страховщик” ўзи.

Гулчехра: Қандай қилиб унда актер бўлгансиз?

Адиз: -Шунинг учун хам актер бўлганман-да (кулади)

Гулчехра: Ўзингизга қандай характерли одамман деб ўйлайсиз?

Адиз: -Характери оғир.

Гулчехра: Қаттиққўл?

Адиз: -Қаттиққўл.

Гулчехра:Рашкчи?

Адиз: -Ха.

Гулчехра: Хозирги болаларга кўпроқ замонавий қизлар ёқади, «наглый», талабчан..

Адиз: -(саволни бўлиб эътирозли охангда) Бундайлар ёқиши хақида қаердан бунақа фикр?

Гулчехра: Эшитинг-да, кўрганман, эшитганман. Мен хайрон қолганман. Бизни бир актер боламизга, кимлигини айтмайман, шунақанги бир қиз ёқади-ки, у қизни фақат эрталаб кўчани супурганини кўриш мумкин экан. Бунга қандай қарайсиз?

Адиз: -Йўқ, Гулчехра, бировни шахсий фикри бўлгани билан айблаб бўлмайди, хаммада хар хил фикр. Сизда ўзингизни фикрингиз, ўзимники бошқа фикр..

Гулчехра: Шу ўзингизни фикрингизни билгим келяпти

Адиз: -Энди мени ўзимни фикримни айтгим келмаяпти хеч кимга, тўғриси.

Гулчехра: Қанақа қиз бўлишини хохлардингиз?

Адиз: -Қанақа қиз? Шу хар бир эркакка, барибир негизини олиб қараганда, уйим-жойим дейдигани ёқади. Баландпарвоз бўлса хам, уйим-жойим, бўлди. Тушунадиган.

Гулчехра: Уйим-жойим дейдиган қиз замонавий хам бўлиши мумкин-ку тўғрими?

Адиз: -Албатта, масалан, кийиниши майли ярашиб турса замонавий бўлса бошқа, лекин бачкана ва хаддан зиёд эътибор тортадиган кўринмасин. Мени аёлим чиройлик бўлса мен хурсанд бўламан.

Гулчехра: Хотинингиз биринчи фарзандни ўғил туғса нима совға қилган бўлардингиз?

Адиз: -Хотингами?

Гулчехра: Албатта! Ким ахир туғди? (кулишади) Мана хурсанд бўлиб кетдингиз, ўғил, энди албатта Худони бергани, лекин барибир эркаклар ўғил деса бошқача қарайди, шунга, нима совға қилган бўлардингиз?

Адиз: -Хеч ўйлаб кўрмаган эканман

Гулчехра: Аёлни нима билан ўшанда хурсанд қилса бўлади деб ўйлайсиз?

Адиз: -Менимча аёлга озгинча тушуниш, диққат-эътибор бўлса ўша пайт, шу эри олдида бўлса бошқа яна нима керак аёлларга?

Гулчехра: Мени қайси ролларим ёққан, фақат биттасини айтинг? Кўрганмисиз ўзи?

Адиз: -Албатта кўрганман, хафа қиляпсиз. "Фотима ва Зухра” фильмидаги ролингиз менга жуда ёқади, зўр.

Гулчехра: Қайси лавха?

Адиз: -Умумий фильм ёққан, қандай лавха бўлмасин унда хиссангиз борку тўғрими? Катта опаси билан иккиси дарахт тагидаги диалоги. Арвох билан учрашганда. "Эгизаклар” фильмида эса умуман бошқача бўлган экансиз-а? (кулишади) . Яна «Шабнам”ни кўрганимдан кейин кўчада худди шунақа қизни учратдим, сочлари ўрилган, дўппиларда, ярим йиллар аввал кўргандим.

Гулчехра: "Шабнам” фильмига монанд клипда суратга тушдингиз, ўша қизда Шабнамни кўргандек бўлдингизми?

Адиз: -Тўғрисини айтсам, "Шабнам”ни рухиятини сезмадим хам, шунчаки уларнинг гапи бўйича Шабнам дейишганиди. Ўхшашлик ёки эслатувчи нарса кўрмадим.

Гулчехра: нимага энди клипда "Шабнам” фильмини..

Адиз: -Гулчехра, бу савол менга эмас. Бу савол ўша клипни суратга олганларга .

Гулчехра: Шу фильмда Улуғбек Қодировни ўрнида бўлганингизда рольни қандай ижро қилган бўлардингиз?

Адиз: -Улуғбекдан бошқасини тасаввур қила олмайман, тўғриси.

Гулчехра: Нимага?

Адиз: -Билмадим, у шу рольга тўппа-тўғри ва мос келган.

Гулчехра: Улуғбек билан бу фильмни сценарийсини иккимизга беришганида роса хурсанд бўлгандик шу фильмда иштирок қилишимизга.

Адиз: -Фильмда иштирок қилгандан сўнг хурсанд бўлмадингизми?

Гулчехра: Мана қаранг, менда қандай бўлади, бошқа актриса роль ижро қилган фильмини кўриб, мен шу рольни қандай ижро қилган бўлишимни тасаввур қиламан. Қайсидир сахнасида юрагимни бериб ижро қилган бўлардим хам деб юбораман, у актрисага адоват ёки ўрнига бўлиш эътироз эмас, ижодкор сифатида тасаввур қиламан.

Адиз: -Йўқ. Менда бўлмаган. Хамма актер ўз жойига тушгани учун хам, мен ўзимни тасаввур қила олмаганман.

Гулчехра: Қайси режиссер билан ишлаш, қайси режиссер аураси Сизга ёқади? Қайси режиссернинг ижодий мухити яқин?

Адиз: -Ёлқин окани аураси ёқади. "Пойма-пой”да бирга ишлаганмиз. Ўша керакли мухитни яратиб бера олади.

Гулчехра: Яхши саволлар бердим лекин жавоблар тўлиқ олмадим, яхши очилмадингиз, балки тўғридир, лекин мен журналистлар билан очиқ гаплашишга харакат қиламан, чунки журналистлар ортида халқ турибди.

"Журналист-юлдуз” лойихамизнинг бугунги ижара хомийси "Siesta” мебеллар салонига ташаккур билдирамиз

Мазкур салон мебеллари қизиқтирган бўлса Бунёдкор кўчаси 6а уйда жойлашган "Siesta” мебеллар салонга келиб харид қилишингиз мумкин.